Геннадий Герасимович ЛЕБЕДЕВ, Катькас территори пайĕн пуçлăхĕ

Геннадий Герасимович ЛЕБЕДЕВ, Катькас территори пайĕн пуçлăхĕ:

– Унччен ял тăрăхĕн пуçлăхĕнче, кăçалтанпа территори пайĕн пуçлăхĕнче пĕрремĕш çул мар ĕнтĕ ĕçлетĕп. Вырăнти влаç органĕнчи стаж 23 çулпа танлашать. Çавна май ялсенче пурăнакансен кулленхи ыйтăвĕсем-проблемисем те, пĕрлехи вăйпа хамăр туса ирттерме пултарн ĕçсем те – пĕтĕмпех куç умĕнче.

Пĕтĕмпех танлаштарура курăнать. Ял çыннин пĕтĕмпех йĕркеллĕ ниепле те пулаймасть. Ыйтăвĕсем унччен те пулнă, халĕ те вĕсем çителĕклех, малашне те пулаççех. Апла пулин те юлашки çулсенче вырăнти самай пĕлтерĕшлĕ ыйтусене, пысăк проблемăсене те татса пама тăрăшатпăр. Хăйсемшĕн ытларах чи малтан хăйсен тăрăшмаллине çынсем те ăнланса илчĕç, çитменнине ял пурнăçне çĕнетсе улăштарассипе республика шайĕнче те хальхи вăхăтра тĕрлĕрен программăсем, проектсем пур. Чи малтан вырăнта пурăнакансем пуçаруллă пулни кирлĕ.

Юлашки çулсенче çынсене ĕçмелли шывпа тивĕçтерессипе, урам хушшинчи çулсене юсассипе çине тăрса ĕçлеме тăрăшатпăр. Ку енĕпе вара пуçарулăх бюджечĕн программин майĕсем пĕчĕк мар. Çитменнине çапла майпа пурнăçа кĕртекен пуçарулăх проекчĕсем çине республика енчен уйăракан тимлĕх те пысăк, пулăшăвĕ те витĕмлĕ.

Акă 2021 çулта çапла майпа эпир хамăр патра Шомикри Ториково урамĕнче çул юсама, Пошкар урамĕнче ача-пăча вăйă площадки йĕркелеме, Шатракасси масарĕ çинче çурт тума вăй çитертĕмĕр пулсан, пĕлтĕр Анаткасри Заовражная урам çулне юсама, Çеçмерте шыв уçламалли çĕнĕ башня туса лартма пултартăмăр.

Кăçал вара пуçарулăх бюджечĕн мелĕпех Шомик ялĕнче пурăнакансемшĕн питех те пĕлтерĕшлĕ пулса тăракан шыв ыйтăвне татса парас терĕмĕр. Асăннă ялти Пошкар тата Полевая урамсенче пурăнакансем шывсăр тертленни пĕрремĕш çул мар. Паллă ĕнтĕ, 3 километр та 400 м тăршшĕ чавса шыв пăрăхĕсем хурасси, кашни киле шыв кĕртесси хальхи вăхăтра пĕчĕк расхутлă ĕç мар. Сметăпа ĕçсене 8 млн ытла тенкĕлĕх палăртнăччĕ. Ял çыннисен хăйсен 847 пин тенкĕ пухма тиврĕ. Кашни кил хуçалăхĕн 15-шер пин тенкĕ хывма лекрĕ. Апла пулин те çынсем кĕтсе пурăннипе нимĕн те пулманнине ăнланса тĕрĕс йышăну турĕç. Республика бюджетĕнчен 4 млн ытла тенкĕ, округ бюджетĕнчен 2 млн ытла тенкĕ уйăрнă. Çак вăхăта кунта ĕçсем вĕçленсе пыраççĕ ĕнтĕ.

Подрядчик – «АльянсГрупп» ООО тĕлĕшпе нимĕнле асăрхаттару та çук, ĕçсене вăхăтра, пахалăхлă туса ирттереççĕ. Сăмах май, республика конкурсĕн кăçалхи иккĕмĕш тапхăрне хутшăннă проект та пулчĕ. Çапла вара кăçалах Шомик ялĕнче скважинăпа шыв башнине тĕпрен юсама май пулĕ тетпĕр. Çитес çул вара Шомик ялĕнчех ытти урамсенче те шыв пăрăхĕсене улăштарассипе малалла ĕçлеме палăртатпăр.

Вырăнти ыйтусене татса парассипе република пулăшăвĕпе усă курнипе пĕрлех хамăр майсем пирки те манмастпăр. Иртнĕ çулсенче ку енĕпе вырăнти бюджетран та укçа-тенкĕ май килнипе уйăрнă, ял çыннисем хăйсем те тăрăшнă, кунпа пĕрлех спонсорсен пулăшăвĕ те курăмлă. Кун пек спонсорсенчен вара чи малтанах «Моргаушская» чăх-чĕп фабрикине, унăн ертÿçине Владимир Малова асăнса тав сăмахĕ каланă пулăттăм. Тĕрĕссипе вырăнти пĕлтерĕшлĕ пĕр ыйтăва татса парассинчен те предприяти айккинче тăрса юлмасть.

Çапла майпах 2021 çулта Катькасра артезиан скважинине тĕпрен юсаса çĕнетме вăй çитертĕмĕр. Акă тата иртнĕ çул вырăнти бюджетра укçа уйăрнипе, фабрика пулăшнипе тата ял çыннсем хăйсем укçа пуçтарнипе Кораккассинче çĕнĕ шыв башни туянса хунăччĕ. Кăçал ăна чиперех вырнаçтарса лартрăмăр. Башньăна ĕçлеттерме пуçăнассипе, пăрăхсене сыпăнтарса йĕркене кĕртессипе Сергей Шадрин предприниматель строителĕсем аван тăрăшрĕç.

Ял çыннисем хăйсем те чылай тимлерĕç. Уйрăмах вара Владимир Храмов старостăна тата ялти ытти активистсене – Анатолий Харитонова, Владимир Яшкова, Сергей Пушкина ырă енчен палăртса хăварнă пулăттăм.

Сăмах май, кун пек пуçаруллă та хастар активистсем пирĕн тăрăхри кашни ялтах сахал мар. Унччен депутатсен Катькас ял тăрăхĕнчи Пухăвĕн депутачĕ пулнă çынсемпе çыхăнăва çухатма шутламастпăр. Вĕсенчен чылайăшĕ çак вăхăта ял старостин тивĕçне чунпа пурнăçлама тăрăшать. Михаил Бурмисов, Димитрий Гусев, Николай Юлин, Владимир Ильин, Олег Петров – чи активлă старостăпа активист шутĕнче.

Пĕтĕмпех пĕр çыхăнура. Ялти социаллă, культура сферисем те малаллах аталанаççĕ. Çынсене пуçламăш медицина пулăшăвĕпе тивĕçтересси лайăхланать. Пĕлтĕр Калайкассинче «Сывлăх сыхлавĕ» наци проекчĕн «Развитие системы оказания первичной медико-санитарной помощи» регион проекчĕ шайĕнче çĕнĕ ФАП хута кайрĕ. Кăçал вара Кораккасси ФАП-ĕнче капиталлă юсав ĕçĕсем туса ирттернĕ. Çавăнпа та пирĕн тăрăхра пурнăç пĕр вырăнта тăмасть, малаллах аталанать тесе çирĕплетсех калама пулать.